სამოქალაქო განათლების ახალგაზრდული ბანაკს ალუდა გოგლიჩიძე ესტუმრა

29 აპრილს სამოქალაქო განათლების ბანაკს პროგრამის ფარგლებში მომზადებული სამოქალაქო განათლების დამხმარე სახელმძღვანელოს ერთ-ერთი ავტორი ალუდა გოგლიჩიძე სტუმრობდა. ბ-მა ალუდამ ისაუბრა მოსწავლეთა თვითმმართველობის როლზე სასკოლო ცხოვრებაში, არაფორმალური განათლების გავლენის შესახებ ახალგაზრდებში სხვადასხვა საკვანძო კომპეტენციების განვითარების კუთხით, მოქალაქეობრივი ცნობიერების ამაღლების მნიშვნელობაზე, შავი ზღვის აუზის ახალგაზრდული ცენტრის შექმნის თემაზე. მოწვეული სტუმრის საუბარი ძალიან საინტერესო და ინფორმაციული გამოდგა ახალგაზრდებისათვის.

ბატონი ალუდაც კმაყოფილი დარჩა შეხვედრით. 

"დიდი მადლობა ყველაფრისათვის, კიდევ ერთხელ გისურვებთ წარმატებებს ძალიან სასარგებლო საქმეში! ძალიან კმაყოფილი ვარ შეხვედრით. ასეთი გონივრული კითხვები ამდენი ერთად მე მგონი არც მახსენდება" - განაცხადა მან შეხვედრის უკუკავშირისას. ფოტოები

სიქა-ს პოლონელი მოხალისეების ვორკშოპი ბანაკის მონაწილეებისთვის

29 აპრილს სიქა–ს პოლონელმა მოხალისეებმა ეველინა კუბიცამ და მათეუშ რუტამ სამოქალაქო განათლების საგაზაფხულო ბანაკის მონაწილეებისათვის  ვორკშოპი მოაწყვეს, რომელზეც ბანაკის მონაწილეებმა შეისწავლეს პოლონური ნაციონალური ცეკვები. ბანაკის მონაწილეთა შორის ძალიან მაღალი იყო პოლონელი ახალგაზრდების მიერ შეთავაზებული აქტივობით დაინტერესება . იხილეთ ფოტოები 

სტუმრები სამოქალაქო განათლების საგაზაფხულო ბანაკში

27 აპრილს სიქა-ს მიერ ორგანიზებულ "სამოქალაქო განათლების საგაზაფხულო ბანაკს" სტუმრობდნენ PH International-ის პიარ მენეჯერი მანანა ყუბანეიშვილი და ორგანიზაცია „ანიკას“ დირექტორი ირინა ინასარიძე. ქ-მა მანანამ ისაუბრა სამოქალაქო განათლებისა და პედაგოგთა გადამზადების პროგრამის ფარგლებში მიღწეულ წარმატებებზე, სამოქალაქო კლუბების აქტივობებზე, სამომავლო გეგმებზე. ქ-ნი ირინას ორგანიზაცია შშ პირების პრობლემების მოგვარების ხელშეწყობაზე მუშაობს, საუბრის თემაც შეზღუდული შესაძლებლობების მქონე პირთა თვითრეალიზებისა და სოციალიზაციის ხელშეწყობა გახლდათ. საქართველოს სხვადასხვა რეგიონების სასკოლო სამოქალაქო კლუბების ლიდერებმა გაუზიარეს „ანიკას“ წარმომადგენლებს საკუთარი გამოცდილება და მათგან მიიღეს კონკრეტული რჩევები, თუ როგორ შეიძლება დაეხმარონ სპეციალური საჭიროებების მქონე ადამიანებს. 

მოწვეული სტუმრები სამოქალაქო განათლების საგზაფხულო ბანაკის პროგრამის ნაწილია, 28 და 29 მაისს ბანაკის მონაწილეებს კიდევ ელით შეხვედრები საინტერესო ადამიანებთან.

სამოქალაქო განათლების საგაზაფხულო ბანაკი 2014 დაიწყო

26 აპრილს სიქამ დაიწყო სამოქალაქო განათლების საგაზაფხულო ბანაკი წყალტუბოში. ბანაკის ბენეფიციარია 300 მონაწილე საქართველოს 11 რეგიონიდან , მათ შორის 267 მოსწავლე და 33 სამოქალაქო განათლების პედაგოგი. თითეულ ნაკადზე ბენეფიციარებთან იმუშავებს ლიდერებისა და ტრენერების 14 კაციანი გუნდი, ყოველ ნაკადზე ბანაკს ეწვევა 3 მოწვეული სტუმარი, მათ შორის სხვადასხვა სამინისტროების წარმომადგენლები, ცნობილი ადამიანები (მწერლები, სპორტსმენები, მსახიობები), საერთაშორისო ორგანიზაციების წარმომადგნელები, რომლებიც ახალგაზრდებთან ისაუბრებენ აქტიური მოქალაქობრივი პოზიციის მნიშვნელობაზე. ბანაკის სამივე ნაკადში მონაწილეთა რაოდენობა 350-ს გადააჭარბებს. ბანაკი ორგანიზებულია "სამოქალაქო განათლებისა და პედაგოგთა გადამზადების პროგრამის" ფარგლებში, რომელსაც აფინანსებს USAID. პროგრამას საქართველოში ახორციელებს ორგანიზაცია PH International. პროგრამის ფარგლებში სამოქალაქო ბანაკს სიქა უკვე მეოთხე წელია მასპინძლობს. გასული სეზონების განმავლობაში ბანაკში უკვე მიიღო მონაწილეობა 700-დე მონაწილემ. წელს სამოქალაქო განათლების ბანაკის ბენეფიციართა საერთო რაოდენობა უკვე 1000-ს მიაღწევს.

სიქას ორგანიზებით მტკვრის სანაპირო დასუფთავდა

სიქას ორგანიზებით რუსთავის სასკოლო სამოქალაქო კლუბების წევრებმა და თემის წარმომადგენლებმა დედამიწის საერთაშორის დღე აღნიშნეს და  დასუფთავების მასშტაბური აქცია მოაწყვეს.

აქციის ფარგლებში დასუფთავდა რუსთავის დასვენების პარკის გასწვრივ მტკვრის სანაპირო ზოლი, რომელიც სავალალო მდგომარეობაშია, სანაპირო დაბინძურებული იყო  ბოთლებითა და სხვადასხვა საყოფაცხოვრებო ნარჩენებით.

აქტივობას მხარდაჭერა გამოუცხადა საქართველოს მწვანეთა მოძრაობამ და მისმა თავმჯდომარემ ქალბატონმა ნინო ჩხობაძემ, რომელმაც დასასუფთავებლად საჭირო ინვენტარი: ხელთათმანები და პარკები გამოყო.

აქციის დასასრულს ადგილზე მოვიდნენ რუსთავის მერის მოადგილე გიგი ტაბატაძე და ინფრასტრუქტურის  სამსახურის უფროსი გია არჩვაძე, რომლებმაც ორგანიზაციას მადლობა გადაუხადეს აქტიურობისთვის.

მერიის მხარდაჭერით აქციის დასასრულს სპეციალურმა მანქანამ შეგროვილი ნარჩენი გაიტანა.

აქციაში მონაწილეობა მიიღო რუსთავის კლუბების 30 წევრმა და რუსთავის მოსახლეობამ.

ვიზიტი საქართველოს პარლამენტის ეროვნულ ბიბლიოთეკაში

სამოქალაქო განათლებისა და პედაგოგთა გადამზადების პროგრამის  ფარგლებში 24 აპრილს,  სიქა-ს ორგანიზებით, სამოქალაქო კლუბების   წევრები  ესტუმრნენ საქართველოს პარლამენტის  ეროვნულ ბიბლიოთეკას. მონაწილეებმა გაიგეს ბიბლიოთეკის  შექმნის, განვითარებისა და  ძველი თბილისის ისტორიები.

გიდმა, ქალბატონმა ნინო გედენიძემ მონაწილეებს დაათვალიერებინა საგამოფენო დარბაზი, რომელიც დახვეწილი გემოვნებითა და არქიტექტურის რამოდენიმე  მიმდინარეობის ნაზავითაა შექმნილი, ასევე დაათვალიერეს გერმანული, ფრანგული და ქართული ლიტერატურის სამკითხველო დარბაზები, სადაც თავმოყრილია ძალიან საინტერესო წიგნები. მიიღეს კონკრეტული რჩევები წიგნის გამოტანის შესახებ და ასევე ბიბლიოთეკის ვებგვერდზე ელექტრონულად მოძიების შესახებ.

მონაწილეებს მიეცათ უნიკალური შანსი ენახათ უძველესი ხელნაწერი და ბეჭდვითი წიგნები, რომლებიც თითო-თითო ეგზემპლიარი არის შემონახული.

          ვიზიტორი სკოლები იყვნენ: რუსთავის #1„  #9, #11, #20 და #23  საჯარო სკოლების სამოქალაქო განათლების კლუბები.

„ნათელი მომავლის“ წევრებმა ლეიკემიით დაავადებული ბავშვები მოინახულეს

15 აპრილს მარნეულის მე-3 საჯარო სკოლის სამოქალაქო კლუბის „ნათელი მომავლის“ წევრებმა თბილისში, „მშობელთა სახლში“ ლეიკემიით დაავადებული ბავშვები მოინახულეს და საჩუქრები გადასცეს. კლუბის წევრებმა ბავშვებს წიგნები შეუძინეს და პროექტის „ხელმარჯვე ოსტატების“ ფარგლებში მათ მიერვე დამზადებული ხელნაკეთი აქსესუარებითაც დაასაჩუქრეს.  ამავე დღეს კლუბის წევრებმა საკვები პროდუქტები შეუძინეს „ბერი ანდრიას ფონდში“ მყოფ სოლიდური სიმსივნით დაავადებულ ბავშვებს და აქსესუარებთან ერთად ფონდის ხელმძღვანელს დედა თინათინს გადასცეს. საჩუქრების შეძენა მარნეულის #3 საჯარო სკოლის მოსწავლეების მიერ დამზადებული ხელნაკეთი     ნივთების გაყიდვის შედეგად შემოსული თანხით მოხერხდა.

შეგახსენებთ, რომ საქველმოქმედო გამოფენები მარნეულსა და თბილისში "სამოქალაქო განათლებისა და პედაგოგთა გადამზადების პროგრამის" მცირე გრანტების დაფინანსებული პროექტის ფარგლებში გაიმართა. პროექტს USAID-ის დაფინანსებით ახორციელებს ორგანიზაცია PH International. პროგრამის პარტნიორი ქვემო ქართლში „სიქაა“.

პროექტის „მე, შენ, ჩვენ“ დახურვა

რუსთავის #20 სკოლის სამოქალაქო კლუბმა Friendship club დაასრულა მცირე საგრანტო პროექტი „მე, შენ, ჩვენ“. 14 აპრილს მოეწყო პროექტის შემაჯამებელი ღონისძიება. ღონისძიებაზე პროექტის მონაწილეებმა ისაუბრეს განხორციელებული აქტივობების შესახებ, წარმოადგინეს შესაბამისი ფოტო და ვიდეო მასალა, მონაწილეებს, მათ შორის რუსთავის 6 სხვა სკოლიდან, გადაცეს სერთიფიკატები და პრიზები. პრიზებისთვის წიგნების შეძენა სრულად დააფინანსა რუსთავის ახალგაზრდულმა ცენტრმა.  

დამსწრეებმა ერთმანეთს გაუზიარეს პროექტში მიღებული გამოცდილება, ისაუბრეს სამომავლო გეგმებზე და პერსპექტივებზე. 

რუსთავში ქვემო ქართლის სამოქალაქო ინტეგრაციის ახალგაზრდული ბანაკის შემაჯამებელი ფორუმი გაიმართა

10 აპრილს რუსთავში ქვემო ქართლის სამოქალაქო ინტეგრაციის ახალგაზრდული ბანაკის შემაჯამებელი ფორუმი გაიმართა.  ფორუმს დაესწრო ბანაკის მონაწილე 24 (მათ შორის 12 ქართული და 12 აზერბაიჯანული) სკოლის სამოქალაქო კლუბის მეურვეები, მოსწავლეები, პარტნიორი სკოლების წარმომადგენლები. ბანაკის განმავლობაში მონაწილეებმა ტრენერებისა და ლიდერების ფასილიტაციით მუნიციპალიტეტებში არსებული პრობლემების მოსაგვარებლად 10 პროექტი შექმნეს, რომელთაგან ბანაკის ფარგლებში 1300$ ოდენობის გრანტი გაიცა 7 პროექტზე. შედეგად ქვემო ქართლის ყველა მუნიციპალიტეტში მოსწავლეების ძალისხმევით თითო, თემისათვის მნიშვნელოვანი, პრობლემა მოგვარდა: ქ. რუსთავში მე-12 მკრ-ნთან გზაზე მოეწყო წრიული და დაიდგა 9 საგზაო ნიშანი; წალკის მთავარ ქუჩაზე, სადაც საბავშვო ბაღი და სკოლაა განთავსებული, და ბოლნისის 4 ქუჩაზე მოეწყო მოძრაობის შემაფერხებელი ბარიერები, დაიდგა საგზაო ნიშნები; მარნეულში რუსთაველის ქუჩაზე  134 შენობაზე განთავსდა  მისამართის აბრები; მარტყოფში შეკეთდა და შემოიღობა სასმელი წლის ავზი, რომლიდან მიწოდებული წყლით 3000-ზე მეტი მოსახლე სარგებლობს, დმანისის სპორტულ მოედანზე მოეწყო ორი დამხმარე ნაგებობა -  გასახდელი სპორტსმენებისათვის.

ფორუმს ესწრებოდნენ პროგრამის განმხორციელებელი ორგანზაცია PH International-ის წარმომადგენლები, ქ. რუსთავის მერი დავით  ჯიქია  და მერის მოადგილე გიორგი ტაბატაძე,  დმანისის საკრებულოს თავჯდომარე ნოდარი ადუაშვილი. მოსწავლეებმა დამსწრე საზოგადოებას წარუდგინეს განხორციელებეული პროექტების ანგარიში, ნაჩვენები იქნა ფილმი ბანაკის მიმდინარეობისა და შედეგების შესახებ.

ქ. რუსთავის მერმა დ. ჯიქიამ და დმანისის საკრებულოს თავჯდომარემ ნ. ადუაშვილმა აღფრთოვანება გამოთქვეს მოსწავლეების აქტიური მოქალაქობრივი პოზიციით და მომავალშიც დიდი მხარდაჭერა და თანადგომა გამოუცხადეს თემის საჭიროებების მოსაგვარებლად დაგეგმილი აქტივობების განხორციელებაში.

ახალგაზრდული ფორუმის პროექტით რუსთავის სკოლების სპორტული ინვენტარით მომარაგება

2013 წლის 30 ნოემბერს სიქა-ს მიერ სამოქალაქო განათლებისა და პედაგოგთა გადამზადების პროგრამის ფარგლებში რუსთავში ორგანიზებულ ახალგაზრდულ ფორუმზე, რუსთავის სამოქალაქო კლუბების წევრებმა ქალაქში არსებული პრობლემებიდან ერთ-ერთ მნიშვნელოვან პრობლემად სპორტული მოედნების მოუწესრიგებლობა დაასახელეს, რის გამოც მოქალქეებს შორის ნაკლებად ხდება ჯანსაღი ცხოვრების წესის პოპულარიზაცია და ხელშწყობა. პრობლემის მოსაგვარებლად შერჩეული იქნა რუსთავის ოთხი სამიზნე სკოლა, რომლებიც გამოირჩევიან სამოქალაქო აქტიურობის სიმრავლით და ამავდროულად, მათი სპორტული მოედანი საჭიროებს გარკვეულ რეაბილიტაციას. მოხდა შერჩეული სკოლების საჭიროების კვლევა, რის საფუძველზეც მათთვის შეძენილი იქნა საკალათბურთო ფარები და ფრენბურთის ბადეები. 

3 აპრილს რუსთავის რუსთავის #4, #11, #23, #24 სკოლებს გადაეცათ სპორტული ინვენტარი, იმავე დღეს თემის წევრების, სკოლის ადმინისტრაციისა და მოსწავლეების ჩართულობით მოხდა ფარებისა და ბადეების დამონტაჟება. რუსთავის #11 სკოლაში დაიგეგმა ჯანსაღი ცხოვრების წესის ხელშემწყობი კვირეული.

საქველმოქმედო გამოფენა-გაყიდვა პროექტის "ხელმარჯვე ოსტატის" ფარგლებში

7 აპრილს მარნეულის #3 სკოლამ პროექტის “ხელმარჯვე ოსტატები“ ფარგლებში საქველმოქმედო გამოფენა-გაყიდვა მოაწყო. ღონისძიებისთვის ფართი უსასყიდლოდ გამოყო მარნეულის კულტურის სახლმა.

მოსწავლეებმა წარმოადგინეს თავიანთი ხელით დამზადებული სამკაულები და აქსესუარები. გამოფენა გაყიდვის მეორე ეტაპი, მარნეულის შემდეგ, იგეგმება თბილისში,  კავკასიურ სახლში.  გამოფენა-გაყიდვიდან შემოსული თანხა იაშვილის სახელობის ბავშვთა საავადმყოფოს გადაეცემა. 

პროექტის "უსაფრთხო გარემოს" შემაჯამებელი შეხვედრა

მარნეულის #5 საჯარო სკოლამ განახორციელა პროექტი „უსაფრთხო გარემო“, რითაც სკოლას აქტუალური პრობლემა მოუგვარდა. წვიმის დროს შესასვლელში ისეთი გუბე დგებოდა, რომ სკოლაში შესვლა უსაფრთხო აღარ იყო.  პროექტის ფარგლებში მოწესრიგდა სკოლაში შესასვლელი, მოსწავლეების და მშობლების დახმარებით დაიგო ფილაქანი და ახლა მოსწავლეებს და უფროსებს სკოლაში შესვლა ნებისმიერ ამინდში უსაფრთხოდ შეუძლიათ.

7 აპრილს მარნეულის მუნიციპალიტეტის შენობაში შედგა პროექტის შემაჯამებელი შეხვედრა. შეხვედრას ესწრებოდნენ სამოქალაქო კლუბის აქტიური წევრები, ადგილობრივი თვითმმართველობის,  სკოლის და სიქა - საგანმანათლებლო ინიციატივების ქართულ ასოციაციის წარმომადგენლები. მოსწავლეებმა სტუმრებს წარუდგინეს პროექტის მიმდინარეობის ამსახველი მასალა, ისაუბრეს სამომავლო გეგმებზე. თავის მხრივ, ადგილობრივი თვითმმართველობის წევრები სამომავლოდაც დაპირდნენ თანადგომას საზოგადოებისთვის სასარგებლო აქტივობების განხორციელებისას. 

სამოქალაქო განათლების საგაზაფხულო ბანაკი იწყება

გაცნობებთ, რომ "სამოქალაქო განათლებისა და პედაგოგთა გადამზადების პროგრამის" ფარგლებში დაგეგმილია "სამოქალაქო განათლების საგაზაფხულო ბანაკის" 3 ნაკადი, რომელსაც ორგანიზებას გაუწევს "სიქა" "მზიან სახლთან" ერთად და ჩატარდება ქ.წყალტუბოში სასტუმრო "წყალტუბო სპა რესორტი"-ს ბაზაზე.

ბანაკის დაწყებისა და დამთავრების თარიღები შემდეგია:

1.      26 აპრილი დაწყება - 1 მაისი დამთავრება;
2.      9 მაისი დაწყება- 14 მაისი დამთავრება (9 მაისი და 12 მაისი ოფიციალური დასვენების დღეებია);
3.      22 მაისი დაწყება- 27 მაისი დამთავრება (26 მაისი დასვენების დღეა).

ქვემო ქართლის რეგიონიდან სულ მონაწილეობას მიიღებს 33 მონაწილე, თითო ნაკადზე 10 მოსწავლე და 1 პედაგოგი.

  

წელსაც, ისევერ როგორც წინა წლებში, ბანაკში მონაწილე მოსწავლეები უნდა აკმაყოფილებდნენ შემდეგ კრიტერიუმებს:

1.      უნდა იყვნენ აუცილებლად პროგრამის პარტნიორი სკოლებიდან;
2.      მათ კარგად უნდა იცნობდეს პარტნიორი ორგანიზაცია და უნდა ჰქონდეს მასთან მუშაობის გამოცდილება)
3.      არ უნდა ჰქონდეთ მონაწილეობა მიღებული პროგრამის ფარგლებში გამართულ არცერთ ბანაკში (არც 2011, 2012 და 2013 წლის საზაფხულო ბანაკებში, არც 2012 და 2013 წლის დებატებისა და საჯარო გამოსვლების ბანაკში და არც სამცხე-ჯავახეთსა და ქვემო ქართლში 2013 და 2014 წელს ჩატარებულ სამოქალაქო ინტეგრაციის ბანაკებში)
4.      მიმდინარე წლის ივნისში უნდა ასრულებდნენ  მე-9 და/ან მე-10 კლასს (ანუ მე-10 და მე-11 კლასებში უნდა იწყებდნენ სწავლას 2014 წლის სექტემბრიდან). თქვენს მიერ წარმოდგენილ სიებში გარკვევით უნდა ეწეროს, თუ რომელ კლასში გადადის მოსწავლე 2014 წლის სექტემბერში.
5.      უნდა იყვნენ სასკოლო სამოქალაქო კლუბების ან საინიციატივო ჯგუფების აქტიური წევრები (მონაწილეობდნენ ჯგუფურ ვიზიტებში, აქციებში, შეხვედრებში, სტაჟირებებში, პროექტებისა და ინიციატივების განხორციელებაში და ა.შ.)
6.      უნდა იყვნენ კლუბის მონაწილეობით საზოგადოების სასარგებლოდ მიღებული გადაწყვეტილების ინიციატორები ან მონაწილეები
7.      უნდა იჩენდნენ აქტიურობას სოციალური მედიის კომპონენტში, სასურველია იყვნენ ბლოგების კონკურსის გამარჯვებულები ან მონაწილეები
8.      სასწავლო პროცესში გავლილი უნდა ჰქონდეთ პროგრამის დამხმარე სახელმძღვანელოები
9.      უნდა გამოირჩეოდნენ სხვა კლუბებთან თანაშრომლობის გამოცდილებით

პედაგოგის შერჩევის კრიტერიუმები:

1.      არის პარტნიორი სკოლის სამოქალაქო განათლების პედაგოგი;
2.      ჯერ არ ყოფილა ჩვენი პროგრამის არცერთი ბანაკის მონაწილე (2011, 2012 და 2013 წლის საზაფხულო ბანაკები, 2012 და 2013 წლის დებატებისა და საჯარო გამოსვლების ბანაკები და სამცხე-ჯავახეთსა და ქვემო ქართლში 2013 და 2014 წელს ჩატარებული სამოქალაქო ინტეგრაციის ბანაკები)
3.      არის სასკოლო სამოქალაქო კლუბის მეურვე
4.      გამოირჩევა წარმატებული საქმიანობით
5.      აცნობიერებს, რომ ბანაკი უპირველეს ყოვლისა ემსახურება შემეცნებით მიზნებს და არა დასვენებას; მზად არის ბანაკის მუშაობაში მონაწილეობის მიღებისათვის;
6.      სწავლებისას იყენებს პროგრამის ფარგლებში გამოცემულ სამოქალაქო განათლების  დამხმარე სახელმძღვანელოებს
7.      გავლილი აქვს პროგრამის (სიტისის ფარგლებში ჩატარებული) ტრენინგი
8.      კარგად იცნობს პარტნიორი ორგანიზაცია და აქვს მასთან ნამუშევარი.


სკოლებიდან შეირჩევა მხოლოდ 1 მოსწავლე და 1 პედაგოგი. პროგრამის პარტნიორ ყველა სკოლას დაგზავნილი აქვს შესავსები ფორმები. შერჩეული მსწავლის და მასწავლებლის სია სკოლებმა უნდა გადმოაგზავნოn 10 აპრილს ელ.ფოსტაზე civic.siqa@gmail.com. მათ მიერ გადმოგზავნილი კანდიდატებიდან სიქა შეარჩევს ბანაკის მონაწილეებს.

პროექტი "სადაც დაღლა, იქ დასვენებაა!" თეთრიწყაროს მუნიციპალიტეტში წარმატებით მიმდინარეობს

სიქას მიერ "სამოქალაქო განათლებისა და პედაგოგთა გადამზადების პროგრამის " ფარგლებში ორგანიზებულ სამოქალაქო ინტეგრაციის ახალგაზრდულ ბანაკში თეთრიწყაროს მუნიციპალიტეტიდან ქ. თეთრიწყაროს #1 და კოდის საჯარო სკოლის სამოქალაქო კლუბების აქტიური წევრები იყვნენ ჩართულნი. ახალგაზრდები მუნიციპალიტეტში არსებული პრობლემების რანჟირებისას თეთრიწყაროსა და კოდისათვის აქტუალურ საერთო პრობლემაზე შეჯერდნენ: შეექმნათ ქ.თეთრიწყაროს საზოგადოებრივი სტადიონის 1000 -მდე მომხმარებელისა და კოდის საჯარო სკოლის 500 მოსწავლის, მათ მშობლებისა და პედაგოგებისათვის დასვენებისათვის ხელსაყრელი პირობები.

ახალგაზრდებმა თანამშრომლობისათვის მიმართეს თეთრიწყაროს ადგილობრივ თვითმმართველობას, მათ მხარდაჭერითა და ხელშეწყობით, თემის წევრებისა და კლუბის წევრების აქტიური ჩართვით მოხერხდა ორივე სკვერის დასუფთავება და რეაბილიტაცია. თეთრიწყაროს ადგილობრივი თვითმმართველობა კლუბებს დაეხმარა სკვერების სარემონტო მასალის ტრანსპორტირებაში, ასევე იგეგმება განახლებულ სკვერებში ახალი ნარგავების გაშენება.

პროექტი "გზა გავუკვალოთ ჯანსაღ თაობას" წარმატებით განხორციელდა

დმანისის #3 და იაღუფლოს საჯარო სკოლების სამოქალაქო კლუბების წევრები და კლუბის მეურვეები დმანისის საკრებულოს თავჯდომარესთან ნოდარ ადუაშვილთან ერთად 

5 აპრილს სიქა-ს წარმომადგნელები დაესწრნენ დმანისში საფეხბურთო ტურნირს, რომელიც „სამოქალაქო ინტეგრაციის ახალგაზრდული ბანაკის“ შედეგად განხორციელებული პროექტის „გზა გავუკვალოთ ჯანსაღ თაობას“ ფარგლებში მოეწყო. ტურნირში ერთმანეთს შეხვდნენ დმანისის #1 და #3, ჯავახის, იაღუფლოს, განთიადისა და ზემო ოროზმანის სკოლების საფეხბურთ გუნდები.

სამოქალაქო ინტეგრაციის ახალგაზრდულ ბანაკში დმანისის მუნიციპალიტეტიდან ორი სკოლა - ერთი ქართული და ერთი აზერბაიჯანული სკოლის მოსწავლეები და კლუბის მეურვეები იღებდნენ მონაწილეობას. ბანაკის მიმდინარეობისას მონაწილეებმა დმანისის მუნიციპალიტეტში არსებული პრობლემებიდან განსაკუთრებით გამოყვეს დმანისის სპორტულ მოედანზე სპორტსმენებისათის გასახდელი ნაგებობის სავალალო მდგომარეობა, რაც მნიშვნელოვნად უშლიდა ხელს სპორტული აქტივობების ორგანიზებას, ახალგაზრდებში ჯანსაღი ცხოვრების წესის პოპულარიზაციას.

ტრენინგი "გენდერული თანასწორობა" სამოქალაქო კლუბ "ახალი თაობის" წევრებისთვის

სიქა-ს ევროპელ მოხალისეებმა 3 აპრილს, "სამოქალაქო განათლებისა და პედაგოგთა გადამზადების პროგრამის" ფარგლებში ჩაატარეს ტრენინგი თემაზე „გენდერული თანასწორობა“. ტრენინგი ჩატარდა მარნეულის მე-5 საჯარო სკოლაში, რომელსაც დაესწრო სამოქალაქო კლუბ „ახალი თაობის“  25 წევრი.

ტრენინგის მიზანი იყო ახალგაზრდებს უფრო მეტი ინფორმაცია მიეღოთ გენდერული თანასწორობის შესახებ. ტრენინგი მიმდინარეობდა ინტერაქტიულად, კითხვა-პასუხის რეჟიმში. მონაწილეები გაეცნენ უცხოელი მოხალისეების მიერ მომზადებულ პრეზენტაციას, სადაც მოყვანილი იყო საქართველოში გენდერული თანასწორობა-უთანასწორობის მაგალითები, სტატისტიკური მონაცემები და სხვა. ტრენინგი მიმდინარეობდა თარგმანით ინგლისურიდან ქართულ ენაზე. ღონისძიების დასასრულს კლუბის წევრებმა კმაყოფილება გამოთქვეს ტრენინგის გამო და აღნიშნეს, რომ მსგავსი შეხვედრები ხელს უწყობს ახალგაზრდების ცნობიერების ამაღლებას გენდერული თანასწორობის საკითხში. ასევე მათ მიეცათ ინგლისური ენის სმენისა და ლაპარაკის უნარების პრაქტიკაში გამოეყენებინების საშუალება.